Copernicus in 1543 a, leitung leh sol (planet) te nisa kimvel a kipei ahi uh (Heliocentrism) chia laibu a published ziak in Roman Catholic apan dalna nasatak tuak pah hi. Saptuam ngaihdan in bel, leitung pen alai a om in, nisa leh sol te leitung kimvel a kipei hizaw chih ahi, Bible a kigelh dan ahi chihziak in. Hiai ngaihdan hong piankhiatna ding a Bible chaang pansan taangpi te; Psalms 104:5 (NIV) “He set the earth on its foundations; it can never be moved”, Ecclesiastes 1:5 (NIV) “The sun rises and the sun sets, and hurries back to where it rises”, Joshua 10:13 (NIV) “So the sun stood still, and the moon stopped…...The sun stopped in the middle of the sky and delayed going down about a full day”.
Bible interpretation khelh leh literal tak a lak ahihziak in hiaibang ngaihdan pen absolute truth dan a ngaih hong hi a, adang ngaihdan te ngaihkhiat hinonlou in leh Bible kalhna bang a ngaih in ompah hi. Ahi a Bible interpretation kheng zek hileng, Psalm 104:5 in “Leitung ama omna ding a ngak ahi a, suk tat ahi ngeikei ding (free style)” chihtheih hi. Huai in bel Leitung taanglou bilbel chihna hilou in, ‘Leitung ama omlouhna ding mun ah omngeilou ding, Pathian in a omna ding mun a bawlsa ahihziak in’ chileng a gen utpen tak genkha zaw bangsim.
Ecclesiastes 1:5 leh Joshua 10:13 in bel Nisa kikhin ahihdan hon lak hi. Houchik in gen leng, Gari na tuan chiang a na kiang a singkung te a lehtai dundun bang ua, a tuanglou te adia na gari pen tai (kikhin) ahi (sapte’n relative motion achih uh). Huai mahbang in, Bible leitung mi adia gelh ahi a, nisa kikhin mah a gelh ahi. Leitung a omte muhdan in nisa a kikhin dia, Nisa apan enleng leitung kikhin thou ding ahi. Huaiziak in hiai Bible chaang te, Leitung a kikhin hetkei chihna ding a zat dikkhin lou ding chihna ahi.
Ahi a, ngaihdan dang himhim diklou leh Bible kalh chia Saptuam in a pomziak in hiai ngaihdan pen thudik, Pathian thu chiin saptuam in pom a, ngaihdan dang neite gawtna piak theihna ding dan (law) bawlkhiat hipah hi. Mipi adi’n adik-leh-diklouh poimoh masa lou in, saptuam pom leh pomlouh hong poimoh hi. Huaiziak tak in, Copernicus mah inle Saptuam apan dalna nasatak tuak in, a thugelh te kuamah ngaihsak inleng om vaklou hi (thuzuau leh Bible kalh chia ngaih ahihziak in).
Huchibang kallak ah, Copernicus ngaihdan (leitung leh sol te nisa kimvel in a kipei) chih pompih bel ana omsam hi. Italy a Catholic siampu, Mathematician leh philosopher Giordano Bruno leng khat ahi. Aman bel Copernicus ngaihdan a pom kia hilou in telsuina tuamtuam ah panla in, a muhkhiat te puangkhia zel hi. Huaiziak tak in, Siampu himahleh, Bible kalh chiin,16 February 1600, in Rome ah haallup (burn to death) in om hi.
Mi minthang telsuimi, Philosopher, Galileo Galilei in bel Copernicus ngaihdan ana pom pahlou a himahleh Telescope a hon bawlkhiat khit in Copernicus dik ahihdan hon musuah hi. June 22, 1963 in Galileo leng, Saptuam in, Bible kalh chin thutankhum ua, a gindan gelh leh puangzak nonlou ding a thupiak in om hi. Galileo in Saptuam thutanna a pomziak in thah hilou a, himahleh a damsung house arrest a koih in om hi.
Apoimoh pen bel, saptuam ngaihdan ahikei a, Copernicus ngaihdan leng ahituan kei, a poimoh pen chu kua ngaihdan thudik ahi a chih ahizaw. Tuchiang inbel Copernicus ngaihdan i pomvek ta ua, a dik leng ahi. Saptuam a mikhenkhat te ana kideihkhop luatziak un Telsuina leh Bible kikalh sak den nilouh khathei uh hi. Bible thudik ahi a, Telsuimite’n leng thudik mah hon suikhe zel ding ahi ua, thudik leh thudik kikalh chih a om vakkei. Huaiziak in Bible interpret dan i siam kei ua, ei mah ngaihdan dan a i kaih mok uhleh i naupang te un Bible pen thuhoih kigelhna laibu maimai bang in honzang khathei uh ahi.
Proverb 25:2 (NIV) “It is the glory of God to conceal a matter, to search out a matter is the glory of kings”. Pathian thupina a bei ngeilouh ding bang in, Pathian selguk thilte pholhsuah vek chih om ngeilou ding ahi. Pholhsuah a om sunsun te bel a pholhsuahtu adia thupina ahi bok. Huaiziak in Bible chaang khat leh nih khong zang in Pathian thupina leh thilbawl dan theihsuah ding ahikei a, sun-leh-zan a telsuina leh kuhkalna ziak a Pathian thupina te awl awl a muhsuah leh pholhsuah ahizel ding a, Telsuimi te ading inleng thilmuhsuah amau thupina ahi. Huchilou a, ‘telsuina leh Bible kikalh ahi a, khat zokzok na tel ding’ chia i teelsak sawm mok leh i naupang te’n ngaituahna nei ngamlou ding ua, a ngaihtuah thei sunsun te’n Bible hon daangbawl khathei uh ahi. (Telsuina khempeuh adik chihna hisaamlou ahi)
Pathianthu’ awina leh ginna ichih mimal a ahi a, Saptuam bel Khrist a ginna nei te kipolkhomna ahi. Huaiziak in nangmah ginna saptuam a ahikei a, Saptuam paidan teng leng nang mimal a ahisam kei. Midang te Pathianthu’ awidan nang va saipih luat a phatmoh louh bang in, mi kho-hei leh gamtatdan endiktu dia seh na hihlouh lam kithei in. Na ginna in midang chitlouhna hon muhsak ding ahikei a, na ginna in nangmah leh na innkuante kiang ah kipahna leh lungnopna hon tut ding hizaw ahi. Na ginna in dotna bawl ngamlou ding a hon gakchip ding ahikei a, na ginna ziak a dotna haksazaw te dotngamna na neih poimohzaw hi. Ginna in na ngaihtuah na a henchip ding ahikei a, ginna in zalenna honpiak ding hizaw ahi.
Comments
Post a Comment