Siamsinna i chih tuhun leh maban hun hong paitou ding a kivenna galvan muanhuaipen ahihbanah a lauhuaipen leng hibok hi. Banghang hiam chihleh siamsinna in thil tampi theihna hon neisak a, na ngaihtuahna liansak in thil khempeuh ah laakdan hoihtak leh kichiantak hon pethei hi. Huaimai hilou in na thil geeldan leh hihdan midangte adia laaktak leh ettontak hisak, chihbel thil haihuaipi gen ding in na ngaihtuahna leh theihna in hon phallou a midangte mai ah zahlakna hilou in zahtaakna hon musak hi. Haksatna mun ah thilhoih leh hoihlou kichiantak in hon lak a, a lampi hoihpen hon kawkmuh thei siamsinna ahihlam i mangngilh louh uh poimoh hi.
Siamsinna in maban hong paizel ding ah naupangte leh tuailaite gam-le-nam poimohna theisiam ding leh a khantouh theihna dingin pilna leh siamna guan hi. Siamsinna poimoh lua ahihman in India danbupi in 'Right to education act' kichi thupiak ana namkip khin hi. Hiai dan dungzui in naupang kum guk apan sawm-le-li tante kiang ah siamsinna piak ngeingei ding chih ahi hi. Hiai dan state leh local solkal vuak hilou in phualpi solkal mahmah in leng enkai ngal hi.
Samsinna poihmoh lua chi in gengen lehang le siamsinbuk poimoh masa hi. Huai dingin i gam a siamsinbukte hoihtak a etkol leh puah poimoh hi. Nu-le-pate'n tate maban ding ngaihtuahna a siamsinna hoihtak piak utlua hinapi in sum-le-pai haksatna ziak in a deihbang uh siamsinbuk mulou uhi. Mimal siamsinbukte ah sum tampi seng a kaisak ding tum in guhtui-kang zen in pang mahle uh nektawm zong innkuan a ding in haksatna leh lunglelhna guan hi. Huaiziak in i gam a government’ siamsinbuk om sunsunte i puah uh kuul hi. Banghanghiam chihleh siamsinbuk pen siamtak leh chintak a hilhtu ding omlouh na ah zusa' tenna ding lou azatna'ng omlou hi. Government in sum a mok senna hilel hi.
Khovel khantouhna thusim et in siamsinna in mun poimohtak len den hi. Tumlam gam (Europe) banah America (USA) gamte pen siamsinna kipatna ahihbang un khovel a khangtoupen gam kia hilou in, sum-le-pai (economic) leh galvan (defence) a khovel mun tuamtuam-te lauh gam ahi uhi. Kum, 2016-17 siamsinbuk hoihpen teelna Times Higher Ranking (THE) in a neihna ah leng gam khangtou mahmah UK ah Oxford University in khatna luah a, USA a om California Institute of Technology in a kizom a kum nga alaak khahsuah mahleh siamsinbuk 900 telkhiakte lak ah North America in 148 tak neikha ban lai hi. Hiai in khovel a athupina uh sulang hi. Asia gambup leh Middle East te'n siamsinna pibawl in panla mahle uh nidang pan a ana kichiilsa tumlam gamte dem haksa salai uhi. Huaimai hilou in tulai khovel phe vengvung kaal ah hiamgamna leh haksatna bulpi, mipil loute' kipatna gam Asia leh Middle East ah omden mahleh tumlam gamte ah vaang mahmah hi.
Siamsinna in maban a na hinna ding a poimoh chitna hon pe ding a, na pilna leh chitna in na nek-le-tak ding kaikhawm lel ding hi. Huai in khovel siatna kipatna kholai ah hon pikhe ding a innkuan hoihtak hon piakding banah maban haksatna tampi hon pelsak thei nalai ding hi. Khovel sum-le-pai deihtaak luat ziak a dikloutak a hih lou ding in na gil suvah ding a nang mah hinna nang’ khut leh Pathian’ khut ah omden ding hi. Huaikia hilou in midang hinna leng nangmah gilkial ziaka na laksak louhna ding in hiai siamsinna na neih poimoh hi.
I gam khantouhna ding leh suahtakna ding in pilna leh thuneih siamna ban ah vaihawm leh nungzuih siamna poimoh hi. Huaite nangmah kiang a hon pethei kizilna leh theih utnate siamsinna' kahiang poimoh mahmahte lak ah om hi. Huaimah leng i biak Pathian in ana mukhol lua a, i gam khantouhna ding leh diktatna toh vaihawmna ding ngen a kum bangzahhiam i thum nung un i mai ah siamsin theihna ding hon pia hi. Ahihhang in eite'n Pathian in i thumnate uh dawnglou leh Pathian mai a khiallua kisa kha mahle'ng ama dawnna theilou ki hikha ding hi.
Huai mahbang in eite leng i thumna uh dawnna siamsinna hikha ding hi, Pathian in i ngetpen tangtak in hon pe lou ding a himahleh i muh theihna'ng lampi hon bawlsak zaw ding hi. Chihbel Pathian dang bia Hindu-te mai ah ei Christian-te'n hamphatna i ngahtuam mawk uh thil lamdang ahi hi. Siamsinbukte ah ei a ding in nuamtak a lutna ding hon pia ua, banah sepna zonna ah leng ST quota chih min zang in amau sangmah in leng amau gam ngei ah hamphatna tam kitangkha zaw hi. Huaikia hilou in kum 2017-18 a ding, a PhD (mathematics) Delhi University, India a university hoihpen lak a tel, a zilna ding in General-te'n 94 mark a poimoh lai un en mark khatmah leng ki poimoh lou lel hi. Hiaiteng ziak in i thumnate uh leh i kahnate uh dawnna pen siamsinna ana hi mawk ding in gingtak huai hi. Hiai hamphatna pen i mansuah louh ua piltak leh kuhkaltak a i zat uh poimoh hi, chihbel a omden ding hamphatna hilou hi.
Gam-le-nam khantouh na'ng in siamsinna in makai kia hilou in amah omlou in gam khangtou theilou a, ke niam hulhul hi. Heutu hihna ding a chitna poihmohte siamsinna pan tek hi a, siamsinna tellou in lungsim zaatak om theilou hi. Huaiziak in siamsinna toh na kiton chiang in mipi'n nang ah muanhuaina mu in kinepna thak guan thei a, nang heutu a ahon neih uh hampha kisa in mipi maipha vuak hilou Pathian maipha hon pethei khop a thil hihtheih siamsinna ahi hi. Mi hamsiat dongtu hilou in mi pahtaak leh iit hi ding na hihman in na maban ah vangsiatna hilou in hamphatna kiphah ding a, mi een leh etton a hon suah ding hi. Maban ah 'Zomite hanlung chiam khangtou diam' chih thuvual a piching na'ng in ‘’INNKUAN IN SIAMSINNA MAH AWLE’’ chih masak ngai a hihlam mangngilh kei ni.
Comments
Post a Comment